ليش احنا هيك ؟ // فواز ابوسالم

=

افضل عنوان لقيته لموضوعي (ليش احنا هيك ؟ ) عنجد اشي غريب عجيب ليش احنا هيك ولمتى بدنا نضل هيك ؟ شغلتين بدي انوهلهم قبل البدايه اولا ساكتب باللغه العاميه لانها اسهل في الدخول للقلب والعقل ثانيا مقالي ليس له علاقة بالسياسة نهائيا فلا احد يزاود عليِ بحب الاردن وتراب الاردن وهواء الاردن وملك الاردن , في سلبيات واخطاء تمارس لازم نحكي عنها والا منكون مثلنا مثل الفاسد ,ابلش بمين والا مين باي قطاع نبداء ؟ خلينا نبدا بقطاع المياه , عمركم شفتوا بلد بفصل الشتاء بتغرق وبالصيف بتموت من العطش لا والمشكله ميتين من العطش وبعدنا منستقبل لاجئين ما ضل لاجئين في العالم ما دخلوا الاردن وبصرح رئيس الوزراء انه الافغان مش رح يكلفونا اشي , ابدا ش رح يكلفونا اشي ولا رح يشاركونا بالمي شكلهم جايبن ميتهم معهم اه احنا بالاردن والحمدلله ,افقر ثاني دوله بالعالم من حيث حصة الفرد من المياه حصة الفرد الاردني من المياه تبلغ 72 م3 سنويا بينما بسوريا تصل الى 700 م3 تخيلوا الفرق يا رعاكم الله وللعلم فان خط الفقر المائي المقدر دوليا هو 1000م3 للفرد , ليش هيك يا وزارة المياه ابسط حقوق المواطن ان يحصل على مياه للشرب والحمدلله بالاردن المواطن بضل يستنى دوره بالمي يوم بالاسبوع ,هم المواطن الاردني المي ,اجت المي انقطعت المي اليوم دورانا بالمي , والله بيحرق قلبي المواطن الاردني الي بيقضي طول الليل على سطح البيت بيستنى المي تيجي هاي حياة يا معالي وزير المياه بشرفك المي بتنقطع عندك ؟ شح مياه ؟ لا والله هو شح عقول وخليني اثبتلكم انه شح عقول .اكثر من خمس الى ست محافظات بالمملكه معدل سقوط الامطار السنوي فيها يتجاوز ال 450 ملم, شو بيعني هذا الحكي ؟يعني ان كل متر مربع من الارض يسقط عليه 450 لتر من المياه , وين بتروح هاي المي ؟ كم من هذه الكميه منستفيدمنها وكم منها فاقد ؟ الجواب ببساطه لا نستفيد باكثر من 5%من هذه الكمية والبقيه يذهب هباء منثورا , ليش ما منستفيد من كل قطرة مي ؟ شو الحل ؟ الحل واضح زيادة عدد السدود بل ومضاعفتها هذا هو الحل الوحيد ما في غير هيك ومع ذلك ما حدا متحرك حتى نموت من العطش ,عدد السدود بالاردن 11سد سعتها مجتمعه بحدود ال 350مليون م3 بينما سد الرستن بشمال سوريا لوحده يخزن 250 مليون متر مكعب ,سؤالي لكل مسؤول بوزارة المياه شو في حل لمشكلة المياه بالاردن ؟ ننقل المي بتنكات من الدول المجاوره ؟ حل وحيد ما في غيروا السدود مئات المواقع بالاردن تصلح لبناء سدود بس بدنا عقول تشتغل ما اكثر المسميات عندنا (وزارة مياه … سلطة مياه … شركة مياهنا ) وميتين من العطش كثيرين وقليلين بركه .
وليش احنا هيك يا سياحة ؟ السياحة بالاردن حدث ولا حرج ============ , شو عملتوا يا وزراء السياحة لتطوير السياحة بالبلد ؟ السياحة من سيء لاسواء انا شخصيا لا يمكن افكر ازور اي موقع سياحي داخلي لاكثر من سبب حتى الغابات الطبيعية حاطين عليها مقصات وبياخذوا منك رسوم دخوليه وانت فايت عغابات تقعد تحت شجرة بياخذو منك دخوليه وبعدين بتقعد 3 ايام تعزل الوسخ الي تحت الشجرة واذا غلطت وفكرت تروح على فندق محرز بالعقبة بتحط مبلغ وقدرة . هل تعلم يا وزير السياحة ان ما تنفقهة بليله وحدة بالعقبة بكفيك اسبوع بتركيا باجمل الفنادق ,هل تعلم يا وزير السياحة ان دخل تركيا من السياحة اكثر من دخل الخليج من النفط هل تعلم يا وزير السياحة انه كل ما زرت دوله يتباذر لدهني دائما نفس السؤال ليش احنا هيك ؟ بمعنى ليش احنا مش زي العالم بمعنى ليش ما عنا مسؤولين عندهم شوية انتماء ويشتغلوا من قلب ورب , طيب يا معالي وزير السياحة لما بتطلع رحلات استجمام ما بتشوف كيف السياحة بتكون ما بتشوف الاستقبال ,الابتسامه , النظافة , البرامج , ؟ وين البرامج السياحية وين النظافة وين الترويج للسياحه وين الافكار السياحية ؟ما رحت يا معالي الوزير عشرم الشيخ اذا ما رحت روح وخلي المصريين يعلموك شو يعني سياحة .
ليش احنا هيك ؟ وكل وزارة الها قصة بدنا مجلدات عشان نجاوب على هذا السؤال ليش احنا هيك ؟ ما في وزارة بتفش الغل والسبب والله بسيط ما في انتماء ما في اخلاص وما في اخلاق اتقوا الله يا مسؤولين مجرد ما قعدتوا عالكراسي بتصيروا تدخنوا سيجار . و قبل ما انهي مقالي كلمة حق تقال الى وزارة الداخلية ممثلة بكافة الاجهزه الامنيه كل الاحترام والتقدير لجهودكم الرائعة في حفظ الامن والامان للمواطن اعانكم الله ورعاكم
حفظ الله الاردن وشعب الاردن وقيادته الهاشمية

شكرا لكم.