في رمضان

=

-التهافت على شراء الاطعمة والمشروبات والتشهون

– اغلاق الشارع الرئيسي بمحلات الخضروات والاصطفاف بوسط الشارع ثنائي وثلاثي وبالكاد حتى تستطيع المرور

بسيارتك وانْ حكيت بصيروا يبخّروا عليك وبتعمل باليوم عشر هوشات

– في الاسواق… المصارعة الحرة والمسبات وسباقات الضاحية واستعمال الهروات والبكسات والكفوف على اقل الاسباب… قال لأنهم صايمين.

– النوم نهارا والسهر ليلا

– لومن بقعد ابو بيجاما من النوم بعد العصر وبكون قامطها لتحت اباطه وقعدته بالمطبخ مستهوش وعيونه مجغصه وبتكشّور بهاظ وموه معجبه هاظ ومطفشلْ وبتدخّل بالصغيره والكبيره وما بيطلع من المطبخ غير مطفّر اللي حواليه وهيت قطّبها عاد.

– تعجّ طوايل السفرة بكل انواع المأكولات والمشروبات وثلثينها بتنكبّ بالحاويه.

– ابو لافي وابو غافي معبّيها بصل وثوم للخُنّاق ومبشنقْ ورايح عالتراويح… وهيت عاد إقدرْ وقّف بحدّه وهوه بيضرب صليات عاليمين وعالشمال. اخشع عاد بصلاتك.

– مصاركة الاولاد وضحكهم وصراخهم ومباطحتهم في اغلبية المساجد وازعاجهم للمصلين واذا حكيت مع واحد منهم بتبلشْ مع ابوه.

– كُثر زعلات النسوان مع جيزانهن وهاي رايحه وهاي جايّه.

– كُثر طلبات النسوان ومصاري الزلمه معهوش تا يطلع من ثوبه ومن زيفه.

في اخر ايام رمضان… المراكضه على مشترى الاواعي والشرايط وشوف سوق الحِسبه.. وأُخذلك عاد غلا  بالاسعار.

اخر ٣ ايام من رمضان مشترى الملابس وحلاقه الشباب بعد الفطور لغاية الفجر… وبس يرجع من الحلاقة او مشترى الملابس بصفُقها نومه وما بيصحى الا بعد المغرب من يوم العيد… وهيك لا كِسب العيد ولا صلاة العيد.