جلسة… تأبط شراً… !

=

بقلم / د. مفضي المومني.

إلى أين أنتم ذاهبون…ماذا تريدون من الوطن؟ وأغلبكم ممن تنفعوا وجمعوا الأرصدة بالملايين… ولديكم القصور… والتمور… وسيارات اللاند كروز السوداء الفارهة… وبدلات سان لوران وبوص شوف..! ورواتب وزراء…اللهم لا حسد… وبالآخر تتحولون في لحظة وتحولون الدستور والوطن من مشروع إصلاح إلى مشروع مشاجرة… ! عزا…عزا… وشو هاظا..! قالتها أمي الثمانينية وهي تشاهد جلسة تأبط شراً… عين وصابتكوا… ولا دعوة أرمله..! ولا خطية المعثرين…
موطني الأردن لكني به… كلما داويت جرح سال جرح…..
وتستمر الحكاية يا سادة…وقد نكون على موعد لجلسات أخرى… من ذات الصنف… نعم هذه ديموقراطية الإصلاح.
عندما يصبح الدستور هوشه… والبلد مشروع مشاجرة… والنواب إتحاد مصارعين… والإصلاحات لله يا محسنين… وتفض الجلسة… وتتداخل الجاهات، هون صلحة وهون عطوة وحُبة راس وجاهات ووجاهات وامسحوا هالطابق… وانفضحنا قدام الشعب… مشهد لا تجده إلا هنا… في بلد المنسف بشراب الأملشن… والسمن اللي معكوا خبره… واللحم الجورجي، وعزايم السيارات السوداء… ومناسف على مد البصر… ونواب على الأبواب… ومجلس يستغيث… والعرس عند الجيران… الله الله يا وطني… إنهم يذبحوك من الوريد إلى الوريد… وزغرتي يا هلاله… بانتظار القادم القريب البعيد… هكذا نختزل الوطن…
والأردنيات دونه… بطوشه على كم بوكس… على كم شلوط… مع سمفونية من مصطلحات الشتم الرديئة… وتحيا (اليموقرّيطِية) العتيدة..! (عذراً على التخبيص ترى بطلنا نجمع).
قيل قديماً في الشدة يقاس الصبر..وفي النقاش يقاس العقل… وفي المواقف يقاس البشر..
وهاي نوابنا…جابوهن بحلقه واحده قصدي جلسه واحده… وسهرنا بالأمس على سيل من التندرات والضحك والرقص على الجراح وكانت الحصيله:( 5-0 بوكسات، 10-1 كفوف وخماسي، 6-0 شلاليط، 2-1 مشادات، 30-3 فزيعه، 5-0 زغاريد واويها… !، 1-1 فزيعه لابن بلدي، واحد قتال فردي… 10 مليون متفرج محلياً… وإبصر كم مليون عربياً وكم مليار عالمياً… والحصيلة كرت أحمر بوجه مجلسنا… وانشداه وتفكر وحسرة بقلب مواطنا من ردائة المشهد… والحكومة أكيد مكيفه والله أعلم… ! وبيقولونا في سرهم… .هاي اللي أخترتوهم… ولا تجيبوا سيرتنا إحنا الوزراء… عالاقل ما بنتطاوش علناً..!
ومن المشهد أختار لكم بعض‏ المقتطفات لمن لم يتابع المشهد… :
**دير بالك يوم القيامة تقول أغرتني الحياة الدنيا وأنت من بلد عربي،الله وكيلك بتصير مضحكة بين الكفار… .
** عين وصابت مجلس النواب… أحلى مجلس يا صلاة النبي. عين وصابتنا يا ساتر عين وصابتنا
بخرولنا اياهم… ليوم عوزه.
** مصطلحات جديده…من نوع: إخرس واطلع برا… خرسه تخرس بوزك… إمسكلنا قنوه… بدي أدعس على راسه… ترندات الأمس على جميع مواقع التواصل الإنجماعي وغيره… والدواوين والقعدات..والسهرات.
** تعليق مباراة كرة قدم مدبلج: يا الله ما الذي يحدث امامنا..يا سلام… اجت هدف… والله اعلق واصفق..شوف شف شوف شوف…يا سلام على اللمسات السحرية شوووف شف شوف… قصده (الصفعات والخماسي والبوكسات والمباطحه)… بث وتعليق رياضي مباشر من المنازلة.
** من متطلبات النيابة لياقة بدنية ودورة مصارعه حره وملاكمة.
** إخرس… اطلع برا… انا فاهم غصبن عنك
أنا زي أخوك لكبير ال… معتذرا… أخوي لكبير ما بقلي أخرس… دقيقة يا عمي… انا تعودت اللي بقلي اخرس اقله خرسه تخرس بوزك… فبقلك خرسة تخرس بوزك… هذا الحكي ما بجوزلك… وثاني مره بتعيدها رايح افرجيك شوفه ما شفتها… وجاهي مش اونلاين..!.
** فزعه لنائبه من سنغافوره.!…والله ايدك لأكسرها اللي بتمدها على إبن بلدي….
** إحنا دولة مؤسسات ورايح اخذ حقي بالصاع الوافي… إحنا مو زعران ولا بلطجيه نكسر ونحرق… في دوله وفي قانون… وبعد هيك بنعرف نوخذ حقنا… ولعت..!.
** النائب ح….. يتأهل للنهائي بعد ان ضرب وطرح ارضا خمسة نواب.
** الله يرحمك يا يحيى السعود… راحت عليك الهوشه.
** النائب ال… جالس يجري مكالمه مع المدام… فرطت الجلسة، إعمليلي قلاية بندوره وصينية جاج هيني جاي.
** تخيل تشتري أصوات بمليون دينار لتوكل فيهم كفوف تحت القبه..!
** صوره لعادل امام وعلى عينه ضمادات ويرتدي نظاره سوداء والتعليق مجلس النواب بكره..!
** صوره لوجه نائب منفخ ومزرق ومحمر… وكتب فوقها المشكله إنه النائب ح… كاين يشتغل خباز بالزمانات..!
** رئيس المجلس يطلب من بعض النواب إحضار أولياء أمورهم.
** عيب علينا…ليش معصب… ما بصير تحكي هيك كلام تحت القبة لها وقار… ليش معصب… هذه قبه شريفة لها وقار… .ما قلنالك بنعتذر… اه اعتذر من زملائك… مش قلنا بنعتذر… خلص عاد… امسكلنا قنوه بعد شويه… اسمع اذا بتتجاوز الحديث ساخرجك من الجلسة… إنتبه..!
** بدلة رياضة بوط صيني… قفازات… شروط دخول المجلس ومن دون تطبيق سند..!.
** وضعنا مأساوي… مسخونا ال…..أحسن شي حل السلطتين… وإلغاء مخرجات الحفيد… ونبدأ السنة الجديدة على بياض… .
** العقبة تفوز بدوري الخماسي لمجلس النواب
النائب ح… يتأهل للنهائي بعد أن ضرب وطرح خمسة نواب بأنتظار الفائز من المشاجرة القادمة..!
** صورة لنائب مدمغ… أول ظهور بعد الهوشه…
** صوره لبطل النزال مفتول العضلات خلفيتها
مجلس النواب… الإتحاد الدولي للمصارعة.
**صوره للرئيس متأبطاً شراً وقنوه وواقف عباب المجلس عراس الدرجات… !.
وماذا بعد… تعودنا أن ننسى… وسننتخب ذات الهويشة في المرات القادمة… ونتفرج… فنحن شعب يحب الفرجه أكثر….
أما الإصلاح والمخرجات… ستمر حتى لو كسرتوا بعض… !، واضح أنكم تتأبطون شراً… وواضح ان الأمور قلوب مليانه ومش رمانه… وواضح أن هنالك إحتقانات ونفوس مؤججة بالإحباط… والخيبة، واضح أن قطار الرفاعي سيمر… وانتم من سيزوده بالفحم الحجري والمازوت… وبالآخر راح تطلع (هوشتكم فشوشي).… واعتذاركم من الشعب الطيب لم يلتفت إليه أحد… ففي الوجدان الوطني غصه… حد البكاء… والخوف على مستقبل البلد..!
بكل الأحوال… نحب الأردن… ونحب أن نصبح في قادم الأيام على (عيشه وبلد مثل خلق الله… !)… أردن كما نحب.. وكما يريد لنا أن نكون… وكل هوشه وأنتم بخير… وجايه عليكوا الله لا تعيدوها… ترى أولادنا بيشوفوكم… ومو ناقصين مشاكل… ومغافر….حمى الله الأردن.